കോട്ടയം: ശബരിമല തീർഥാടന സീസണിൽ തിരക്ക് വർധിക്കുമെന്ന വിലയിരുത്തലിൽ റെയിൽവേ സൗകര്യങ്ങൾ മെച്ചപ്പെടുത്താനുള്ള നീക്കവുമായി കേന്ദ്രമന്ത്രി സുരേഷ് ഗോപി. തീർഥാടനവുമായി ബന്ധപ്പെട്ട ഒരുക്കങ്ങൾ വിലയിരുത്താൻ കോട്ടയം റെയിൽവേ സ്റ്റേഷൻ സന്ദർശിച്ച അദ്ദേഹം, കൂടുതൽ പ്രത്യേക ട്രെയിനുകൾ അനുവദിക്കുന്നതും ചെങ്ങന്നൂർ ഉൾപ്പെടെയുള്ള സ്റ്റേഷനുകളിൽ അടിസ്ഥാന സൗകര്യങ്ങൾ മെച്ചപ്പെടുത്തുന്നതും പരിഗണനയിലാണെന്ന് വ്യക്തമാക്കി.
ഈ വർഷം കൂടുതൽ തീർഥാടകർ ശബരിമലയിലെത്താൻ സാധ്യതയുള്ളതിനാൽ സൗകര്യങ്ങൾ വിലയിരുത്താൻ കേന്ദ്ര റെയിൽവേ മന്ത്രിയുടെ നിർദേശപ്രകാരമാണ് സന്ദർശനം നടത്തിയതെന്ന് സുരേഷ് ഗോപി പറഞ്ഞു. തീർഥാടന സീസണിനായുള്ള അടിസ്ഥാന സൗകര്യ വികസന പ്രവർത്തനങ്ങൾ റെയിൽവേ നേരത്തേ ആരംഭിച്ചിട്ടുണ്ട്. കൂടുതൽ റെയിൽവേ സ്റ്റേഷനുകൾ സന്ദർശിച്ച് ഒരുക്കങ്ങൾ വിലയിരുത്തുമെന്നും അദ്ദേഹം അറിയിച്ചു.
സീസണിൽ കൂടുതൽ പ്രത്യേക ട്രെയിനുകൾ അനുവദിക്കുന്നതടക്കമുള്ള കാര്യങ്ങൾ പരിഗണനയിലുണ്ടെന്നും ചെങ്ങന്നൂർ ഉൾപ്പെടെയുള്ള സ്റ്റേഷനുകളിലെ സൗകര്യങ്ങൾ മെച്ചപ്പെടുത്തുമെന്നും മന്ത്രി വ്യക്തമാക്കി. ശബരിമലയിലേക്ക് തീർഥാടകരെ എത്തിക്കാൻ അനുയോജ്യമായ റെയിൽപാതകൾ ഒരുക്കുമെന്ന ഉറപ്പും അദ്ദേഹം നൽകി.
അങ്കമാലി–ശബരി റെയിൽപാതയെക്കുറിച്ചുള്ള ചോദ്യത്തിന്, തീർഥാടകർക്ക് അനുയോജ്യമായ റെയിൽപാതകൾ ഉറപ്പാക്കുമെന്നായിരുന്നു സുരേഷ് ഗോപിയുടെ മറുപടി. കേരളത്തിൽ എയിംസ് സ്ഥാപിക്കുമെന്നും അത് വരരുതെന്ന് ആഗ്രഹിക്കുന്നവർ ആരാണെന്ന് എല്ലാവർക്കും അറിയാമെന്നും അദ്ദേഹം കൂട്ടിച്ചേർത്തു.