കൊച്ചി: ദൈവങ്ങളുടെയോ വ്യക്തികളുടെയോ പേരിൽ നടത്തിയ സത്യപ്രതിജ്ഞകളുമായി ബന്ധപ്പെട്ട കേസുകളിൽ സുപ്രധാന വിധിയുമായി ഹൈക്കോടതി. തിരുവനന്തപുരം കോർപ്പറേഷനിലെ 20 കൗൺസിലർമാരുടെ സത്യപ്രതിജ്ഞ അസാധുവാക്കിയതിന് സമാനമായി, പാലക്കാട് വടക്കഞ്ചേരി ഗ്രാമപഞ്ചായത്തിലെ കോൺഗ്രസ് അംഗം സുനിൽ ചുവട്ടുപാടത്തിന്റെ സത്യപ്രതിജ്ഞയും ഹൈക്കോടതി റദ്ദാക്കി.
വടക്കഞ്ചേരി പന്നിയങ്കര 21-ാം വാർഡിലെ അംഗമായ സുനിൽ, “ഈശ്വരാനുഗ്രഹത്താൽ ഉമ്മൻ ചാണ്ടിയുടെ നാമത്തിൽ സത്യപ്രതിജ്ഞ” എന്നായിരുന്നു പ്രതിജ്ഞ ചെയ്തത്. ഇതിനെതിരെ മറ്റൊരു വാർഡ് അംഗം കോടതിയെ സമീപിക്കുകയായിരുന്നു.
ജസ്റ്റിസ് പി.വി. കുഞ്ഞികൃഷ്ണൻ പുറപ്പെടുവിച്ച ഉത്തരവിലാണ് സുനിലിന്റെ സത്യപ്രതിജ്ഞ അസാധുവാക്കിയത്. ഉത്തരവിന്റെ പകർപ്പ് ലഭിച്ച് നാല് ആഴ്ചയ്ക്കുള്ളിൽ പുതിയതായി സത്യപ്രതിജ്ഞ ചെയ്യണമെന്നും കോടതി നിർദേശിച്ചു.
തിരുവനന്തപുരം കോർപ്പറേഷനിലെ ബിജെപി കൗൺസിലർമാരുടെ സത്യപ്രതിജ്ഞ അസാധുവാക്കിയ അതേ ഉത്തരവിലാണ് വടക്കഞ്ചേരിയിലെ കോൺഗ്രസ് അംഗത്തിന്റെ സത്യപ്രതിജ്ഞയും റദ്ദാക്കിയത്. പുതുതായി സത്യപ്രതിജ്ഞ ചെയ്യുന്നതുവരെ കൗൺസിലർ എന്ന നിലയിലുള്ള പ്രവർത്തനങ്ങൾ നടത്താൻ കഴിയില്ലെന്നും കോടതി വ്യക്തമാക്കി.
അതേസമയം, മുനിസിപ്പാലിറ്റി ആക്ടിന്റെയും പഞ്ചായത്ത് രാജ് ആക്ടിന്റെയും വ്യവസ്ഥകൾ പ്രകാരം ഇതുവരെ അംഗങ്ങൾ നടത്തിയ നടപടികൾക്ക് നിയമപരമായ സംരക്ഷണം ലഭിക്കുമെന്നും ഉത്തരവിൽ പറയുന്നു.
കേരള പഞ്ചായത്ത് രാജ് ആക്ടിലെ 152-ാം വകുപ്പും മുനിസിപ്പാലിറ്റി ആക്ടിലെ 143-ാം വകുപ്പും പ്രകാരം സത്യപ്രതിജ്ഞ ദൈവനാമത്തിലോ അല്ലെങ്കിൽ ദൃഢപ്രതിജ്ഞയായോ വേണമെന്നാണ് നിയമം പറയുന്നത്. എന്നാൽ “ദൈവം” എന്ന പദത്തിന് പ്രത്യേക വിപുലീകരണമോ മറ്റ് നിർവചനങ്ങളോ നിയമത്തിൽ ഇല്ലെന്നും കോടതി ചൂണ്ടിക്കാട്ടി.
നിയമം നിർദേശിക്കുന്ന രീതിക്കു പുറത്തായി വിവിധ ദൈവങ്ങളുടെയോ വ്യക്തികളുടെയോ പേരിൽ നടത്തിയ സത്യപ്രതിജ്ഞകൾ അസാധുവാണെന്ന് കോടതി വ്യക്തമാക്കി. ഇതുമായി ബന്ധപ്പെട്ട് പ്രശസ്ത മലയാള ചലച്ചിത്ര ഗാനത്തിലെ “കുറിവരച്ചാലും കുരിശ് വരച്ചാലും…” എന്ന വരികളും കോടതി പരാമർശിച്ചു.
സത്യപ്രതിജ്ഞയുടെ നിയമപരമായ സാധുതയെക്കുറിച്ചുള്ള ചർച്ചകൾക്കിടയിൽ ഈ വിധി സംസ്ഥാന രാഷ്ട്രീയ രംഗത്ത് വലിയ ശ്രദ്ധ നേടുകയാണ്.