ദില്ലി: കുട്ടികളുടെ സോഷ്യൽ മീഡിയ ഉപയോഗത്തിൽ നിയന്ത്രണം വേണമെന്ന് സുപ്രീംകോടതി. കുട്ടികൾക്ക് സോഷ്യൽ മീഡിയ അക്കൗണ്ടുകൾ അനുവദിക്കുന്നതുമായി ബന്ധപ്പെട്ട് ഐടി നിയമപ്രകാരം കേന്ദ്രസർക്കാർ ചട്ടങ്ങൾ കൊണ്ടുവരുന്നത് പരിഗണിക്കണമെന്ന് കോടതി നിർദേശിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് വിഷയം പരിഗണിച്ചത്. സുപ്രീംകോടതിയുടെ സെപ്റ്റംബർ 28ലെ കോസ് ലിസ്റ്റിലും ഈ ബെഞ്ചിന്റെ ഘടന രേഖപ്പെടുത്തിയിട്ടുണ്ട്.
12 മുതൽ 15 വയസുവരെയുള്ള കുട്ടികൾക്ക് പോലും സോഷ്യൽ മീഡിയ അക്കൗണ്ടുകൾ അനുവദിക്കുന്ന സാഹചര്യം കോടതി ചൂണ്ടിക്കാട്ടി. മാതാപിതാക്കളുടെ സമ്മതം നിർബന്ധമാക്കുന്നതുൾപ്പെടെയുള്ള നിയന്ത്രണങ്ങൾ പരിഗണിക്കാമെന്ന് കേന്ദ്രസർക്കാർ കോടതിയെ അറിയിച്ചു. ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമത്തിലെ വ്യവസ്ഥകളും പരിശോധിച്ചുവരികയാണെന്ന് കേന്ദ്രം വ്യക്തമാക്കി.
കേസ് അടുത്ത മാസം 13ന് വീണ്ടും പരിഗണിക്കും.