ടെഹ്റാൻ: ഉപരോധം മറികടന്ന് ചരക്ക് നീക്കം നടത്തിയെന്നാരോപിച്ച് ഇറാനിയൻ കപ്പലിന് നേരെ അമേരിക്കൻ ആക്രമണം. മധ്യപൂർവേഷ്യൻ സമുദ്രമേഖലയിൽ നടന്ന നടപടിയെക്കുറിച്ച് യുഎസ് സെൻട്രൽ കമാൻഡാണ് സ്ഥിരീകരണം നൽകിയത്.
അന്താരാഷ്ട്ര ഉപരോധങ്ങൾ ലംഘിച്ച് നിരോധിത സാമഗ്രികൾ കടത്താൻ ശ്രമിച്ചതായി സംശയിക്കുന്ന കപ്പലിനെ ലക്ഷ്യമിട്ടാണ് ആക്രമണം നടത്തിയതെന്നാണ് അമേരിക്കയുടെ വിശദീകരണം. കപ്പലിന്റെ സഞ്ചാരപാതയും ചരക്കുകളും നേരത്തെ മുതൽ നിരീക്ഷണത്തിലായിരുന്നുവെന്നും സെൻട്രൽ കമാൻഡ് അറിയിച്ചു.
ആക്രമണത്തിൽ കപ്പലിന് കേടുപാടുകൾ സംഭവിച്ചതായാണ് റിപ്പോർട്ടുകൾ. എന്നാൽ ആളപായമുണ്ടായോയെന്ന കാര്യത്തിൽ ഇതുവരെ വ്യക്തത വന്നിട്ടില്ല. സംഭവത്തെ തുടർന്ന് മേഖലയിൽ സംഘർഷാവസ്ഥ രൂക്ഷമായിരിക്കുകയാണ്.
അതേസമയം, അമേരിക്കയുടെ നടപടി അന്താരാഷ്ട്ര നിയമങ്ങളുടെ ലംഘനമാണെന്ന് ഇറാൻ ആരോപിച്ചു. സമുദ്രാതിർത്തികളിൽ പ്രകോപനപരമായ സൈനിക നീക്കങ്ങൾ തുടരുകയാണെന്നും ഇതിന് ശക്തമായ മറുപടി നൽകുമെന്നും ഇറാൻ മുന്നറിയിപ്പ് നൽകി.
സംഭവത്തെ തുടർന്ന് ഗൾഫ് മേഖലയിലെ സുരക്ഷ ശക്തമാക്കിയിട്ടുണ്ട്. അമേരിക്കയും ഇറാനും തമ്മിലുള്ള സംഘർഷം കൂടുതൽ വഷളാകുമോയെന്ന ആശങ്കയിലാണ് അന്താരാഷ്ട്ര സമൂഹം.