പശ്ചിമേഷ്യൻ യുദ്ധം വസ്ത്രവിലയും കൂട്ടുമോ? എണ്ണവില കുതിച്ചുയരുമ്പോൾ ഇന്ത്യൻ ടെക്സ്റ്റൈൽ മേഖലയിലും ആശങ്ക

ന്യൂഡൽഹി: പശ്ചിമേഷ്യയിലെ യുദ്ധവും ഹോർമുസ് കടലിടുക്കിലെ സംഘർഷവും ഇന്ത്യൻ വസ്ത്രവിപണിയിലും പ്രതിഫലിക്കുമെന്ന ആശങ്ക ശക്തമാകുന്നു. പോളിസ്റ്റർ, നൈലോൺ, സ്പാൻഡെക്സ് തുടങ്ങിയ സിന്തറ്റിക് നാരുകൾ പെട്രോളിയം ഉൽപ്പന്നങ്ങളെ ആശ്രയിക്കുന്നതിനാലും, പരുത്തി ഉൽപ്പാദനവുമായി ബന്ധപ്പെട്ട ചെലവുകൾ ഉയരാനുള്ള സാധ്യത നിലനിൽക്കുന്നതിനാലുമാണ് വരും മാസങ്ങളിൽ വസ്ത്രങ്ങളുടെ വില വർധിക്കുമെന്ന വിലയിരുത്തൽ.

സിന്തറ്റിക് വസ്ത്രങ്ങളുടെ പ്രധാന അസംസ്‌കൃത വസ്തുക്കളായ പോളിസ്റ്റർ, നൈലോൺ എന്നിവ ക്രൂഡ് ഓയിൽ അധിഷ്ഠിത ഉൽപ്പന്നങ്ങളാണ്. അതിനാൽ അന്താരാഷ്ട്ര വിപണിയിൽ എണ്ണവില ഉയരുന്നത് ഇന്ധനവിലയെ മാത്രമല്ല, വസ്ത്രനിർമാണ മേഖലയെയും നേരിട്ട് ബാധിക്കുമെന്ന് വിദഗ്ധർ ചൂണ്ടിക്കാട്ടുന്നു.

വസ്ത്രവിപണിയിലും ആശങ്ക

കോവിഡ് കാലത്തും ഇന്ധനവില ഉയർന്ന സമയത്തും ഉണ്ടായതുപോലെ അസംസ്‌കൃത വസ്തുക്കളുടെ ലഭ്യത കുറയുമെന്ന ആശങ്ക വസ്ത്രനിർമാണ കമ്പനികളിൽ വർധിച്ചിരിക്കുകയാണ്. ഇതോടെ ചില കമ്പനികൾക്ക് താൽക്കാലിക നേട്ടമുണ്ടായപ്പോൾ, മറ്റുചില കമ്പനികൾ ഉൽപ്പാദന പ്രതിസന്ധി നേരിടുകയാണ്.

ലോകത്തെ പോളിസ്റ്റർ നൂൽ ഉൽപ്പാദനത്തിൽ വലിയ പങ്കുള്ള ചില കമ്പനികൾ കുറഞ്ഞ വിലയിൽ മുൻകൂട്ടി വാങ്ങിയ അസംസ്‌കൃത വസ്തുക്കളുടെ സഹായത്തോടെ ലാഭം വർധിപ്പിക്കുമ്പോൾ, പുതിയ അസംസ്‌കൃത വസ്തുക്കളുടെ ലഭ്യത കുറഞ്ഞതോടെ മറ്റു ചില കമ്പനികൾ ഉൽപ്പാദനം കുറയ്ക്കുകയോ താൽക്കാലികമായി നിർത്തിവെക്കുകയോ ചെയ്തിട്ടുണ്ട്.

റീസൈക്കിൾഡ് നാരുകൾക്ക് ആവശ്യകത ഉയരും

അസംസ്‌കൃത വസ്തുക്കളുടെ വിതരണത്തിൽ അനിശ്ചിതത്വം തുടരുന്ന സാഹചര്യത്തിൽ റീസൈക്കിൾഡ് പോളിസ്റ്റർ ഉപയോഗിക്കുന്ന കമ്പനികൾക്ക് താരതമ്യേന ആശ്വാസമുണ്ടാകുമെന്നാണ് വിലയിരുത്തൽ. പുനരുപയോഗ നാരുകൾ ഉപയോഗിച്ച് ഉൽപ്പാദനം നടത്തുന്ന അന്താരാഷ്ട്ര ബ്രാൻഡുകൾക്ക് വിലക്കയറ്റത്തിന്റെ ആഘാതം ഒരു പരിധിവരെ കുറയ്ക്കാനാകുമെന്നാണ് പ്രതീക്ഷ.

പരുത്തി വസ്ത്രങ്ങളും സുരക്ഷിതമല്ല

പ്രകൃതിദത്ത നാരുകളായ പരുത്തിയും ഈ പ്രതിസന്ധിയിൽ നിന്ന് പൂർണമായും ഒഴിവാകില്ല. വളം നിർമാണത്തിനാവശ്യമായ പ്രകൃതിവാതകവും മറ്റ് അസംസ്‌കൃത വസ്തുക്കളും ഗൾഫ് രാജ്യങ്ങളെ ആശ്രയിക്കുന്നതിനാൽ ഉൽപ്പാദന ചെലവ് ഉയരാൻ സാധ്യതയുണ്ട്. ആഗോള വിപണിയിൽ പരുത്തിയുടെ ശേഖരം കഴിഞ്ഞ ഒരു ദശാബ്ദത്തിനിടയിലെ ഏറ്റവും താഴ്ന്ന നിലയിലാണെന്നും റിപ്പോർട്ടുകൾ സൂചിപ്പിക്കുന്നു.

വിലക്കയറ്റം എപ്പോൾ?

നിലവിലെ സാഹചര്യം ഉടൻ വസ്ത്രവിലയിൽ പ്രതിഫലിക്കില്ലെന്നാണ് വിലയിരുത്തൽ. എന്നാൽ അസംസ്‌കൃത വസ്തുക്കളുടെ വിതരണം ദീർഘകാലം തടസപ്പെട്ടാൽ 2028ഓടെ വസ്ത്രങ്ങളുടെ വിലയിൽ വ്യക്തമായ വർധന അനുഭവപ്പെടാൻ സാധ്യതയുണ്ടെന്നും, അതിന്റെ പ്രതിഫലം ദീർഘകാലം തുടരാനിടയുണ്ടെന്നും സാമ്പത്തിക വിദഗ്ധർ വിലയിരുത്തുന്നു.